Sas Puntas derisi e òe
ln sa luntana epoca passada
Fist terra de olias e masones
e hasa in sas bonas istajones
Dadu frutta sana e prelibada
Ma pro cavas de tufu e de contones
Sas Puntas fist connot'e fentomada
Zona pro tantu tempus populada
cun calchi domo e pegas pessones
ma tott'ind'una ti ses ingrandida
ind'una zon'istes'e soliana
meta de tantos sardos preferida
tottu cuddos chi manna fatu t'ana
godan benesser'e paghe saborida
in cussu bicul'e terr'isulana
zente de meilogu e logudoro
anglona, Caddura e goceanu
barbagia, pianalza e campidanu
zent'onesta, cumprid'e bonu coro
òe b'as esercitzios cummerciales
e sos giardinos chi ti dan bellura
ospitas zente, cosum'e cultura
iscolas e ofiscios comunales
ti faghen festas de antigu folclore
fogulones e carros mascherados
paret de viver sos tempos passados
riccos de fratellantzia e amore
bonu su centru pro sos anzianos
a mur'a mes'a su santu patronu
Peppe Sarto già chi ses santu onu
faghe chi vivan allegros e sanos
lontanos dae penas e afannos
bidendela ogni festa cumprida
cun tottu sos valores de sa vida
superen'e passene sos chent'annos
19 de cabidanni 2000
Salvatore Cocco
